Бұл жинаққа детектив жанрының әлемге әйгілі өкілдерінің бірі Жорж Сименонның «Комиссар Мегрэ» сериясымен шыққан екі романы еніп отыр. «Менің досым Мегрэ» шығармасындағы оқиға Поркероль аралында өрбиді. Шағын ғана қалашықта комиссардың ескі танысын айуандықпен өлтірген. Скотланд-Ярдтан келген әріптесімен бірге аралға аттанған Мегрэ оқиғаны егжей-тегжейлі зерттеп, ақырында қылмыскерді құрықтайды.
Ал «Коронердің қонағы» романында комиссар іссапармен АҚШ-қа барып, тергеу шараларын жүргізудің америкалық әдісімен танысады. Мексика шекарасына жақын орналасқан шағын қаладағы теміржол бойынан қыздың мәйіті табылады. Жас қыздың өлімі жазатайым оқиға ма, әлде сарбаздардың айуандықпен жасаған қылмысы ма? Бұл іс Мегрэнің де кәсіби қызығушылығын тудырады.