Қуыскеуде

Бұл кітапта ХХІ ғасырдың ең үлкен проблемасына айналған экзистенциялық фрустрацияның қазақ қоғамындағы пайда болуы мен таралу себептеріне экзистенциялық анализ жасалады. Әлем бойынша өзінің тарихи жадынан айырылып, ана тілі мен төл мәдениетінен көз жазып қалып, рухани тоқырауға тез ұрынған халықтың бірі – қазақ жұрты.
Жалпы адам болмысының іштен бөлшектенуі ХХІ ғасырда жаппай белең алған қауіпті құбылыс саналады. Әзірге өз мәдениеті мен тарихы терең тамырына үңілуге қабілетті, сауатты елдер ғана бұл дертпен сәтті күресіп жатыр. Біз де осының қазақша нұсқасын жасадық.
Кітап қазақ мәдениеті мен танымына қызығатын оқырмандарға арналады.

2012 жылы Женева қаласында «Меланхолия» деп аталатын мүсін пайда болды. Оны румындық скульптор Альберт Гиорги сомдаған еді.
Ескерткіштің ашылуына жиналған көңілді жұрт шымылдық түрілгенде кеудесі үңірейген қорқынышты мүсінді көріп шошып кетті. Бәрі аңтарылып, жыланға арбалған торғайдай қатты да қалды. Шараға жиналған жұрт мүсінге қарап бөтен біреуді емес, құдды бір өзін көргендей күй кешті.
2000 жылғы статистика бойынша әлемдегі әр он адам қуыскеуде дертіне шалдыққан екен. 2010 жылы әр жетінші адам экзистенциялық фрустрацияға ұшырап, іштей ыдыраудың азабын шегіп жатты. Бүгінде «Қуыскеуде» дерті екінің бірін тізе бүктіріп, сырқат атаулының алдына шықты.
Бұл дерт бұрын ғалымдар арасында «экзистенция вакумы» деп аталатын. Енді кесел жаппай жайылып, кісі талғамай жапыра бастаған соң, жұрттың назарын тезірек осы дертке аударуға тура келді. Сол үшін де шеберлер Еуропаның кіндігіне осындай үрейлі мүсінді орнатты. Ең жаманы, бұл дертпен күресуде медицина мен психология шарасыз қалды.
Біз де бұл кітаптың атын әдейі «ҚУЫСКЕУДЕ» деп қойдық. Себебі бұл дерт қазақ қоғамында да асқынып барады. Бұрын бозбаланың өмірге құлшынып тұруы табиғи құбылыс саналатын. Қазір керісінше, жасөспірімдер өмірден соққы жемей-ақ, төсегінде сұлқ түсіп жатып алатын жағымсыз сезімге шырмалды. Енді қазақ қоғамы да адамды енжар күйге түсіретін бұл дерттің атын, тарихын, диагнозын білуі тиіс деп осы кітапты жазып, шығарып отырмыз.