Бұқарбай Б.: Күміс кітап 6-басылым

«Гугл» әлемдегі барлық кітапты санап шығып, олардың жалпы саны 129 864 880 екенін анықтапты. Дүние жүзіндегі ең үлкен АҚШ Конгресінің кітапханасының қорында 33 миллионнан астам басылым бар екен. Жүз жыл өмір сүретін адам жылына жүз кітап оқығанның өзінде ғұмырында ары барса он мың кітаптан асыра алмайды. Осыдан-ақ өмірдің қысқа екенін және білімнің түбіне жетудің мүмкін еместігін байқаймыз. Кітап оқудан бас тартпай, оны сүйікті әдеттеріміздің біріне айналдырғанымыз, қай жағынан алып қарасақ та, тиімді екені сөзсіз. Шетелде жүргізілген зерттеулердің бірінде үшінші сыныпқа дейін оқуға қызықушылығы оянған баланың болашақта түрмага түсу, нашақорлыққа шалдығу немесе оқуын аяқтай алмай қалу ықтималдығы күрт төмендейтіні анықталыпты. Кітап оқитын ересектер екі жарым есе жиі ерікті жұмысқа араласып, қайырымдылық шараларына атсалысады екен.

2016 жылы шыққан соңғы зерттеулер бойынша еліміздегі жастардың сексен пайызға жуығы кітапты не өте сирек оқиды, не оның бетін мүлдем ашпайды екен. Бұл көрсеткіш бізді алаңдатуы тиіс. Еліміз ертең «ақылды» экономика құрып, әлемнің басқа мемлекеттерімен терезесі тең болсын десек, онда кітап оқитын ұрпақ тәрбиелеуіміз керек. Қолыңызға ұстап тұрған кітаптың негізгі мақсаты - жастарды кітап оқуға баулу.

Кітап осы мәселеге қызығушылық танытқан барша оқырман қауымға арналады.