Әнес Сарай : Көк түріктері

Мемлекеттік сыйлықтың иегері, Қазақстанның еңбек сіңірген қайраткері Сарай Әнес Төлендіұлы - әдебиетіміз бен рухани өміріміздегі белгілі тұлға. Қаламгердің «Мұнаралар шақырады», «Қараша өткен соң», «Бозқырау», «Ақ тымық түн» повестері мен әңгімелер жинағы, «Теңіз сарыны» дилогиясы мен «Ұлу аралы», «Еділ-Жайық», «Өртенген керуендер» романдар топтамасынан құралған «Еділ-Жайық» трилогиясы Каспий теңізі кәсіпшілерінің өткені, кешегісі мен бүгінгісіне арналып, басын күнде қатерге тігіп, толқынды көк теңізбен мігірсіз арпалысқан балықшы-теңізшілердің қарапайым да өр мінездерін қалтқысыз айшықтаумен ерекшеленеді. Қазақтың әдеби сыны оны «теңіз жыршысы» деп таниды. Әнес Сарай соңғы жылдары қазақ тарихының ақтаңдақ беттеріне қалам тартумен көзге түсті. Оның қаламынан шыққан «Исатай мен махамбет», «Мұхаммед пайғамбардың өмірі», «Асылдың сынығы», «Көнеліктер», «Ноғайлы» тарихқа әуес бұқара көпшілік іздеп жүріп оқитын, қолға түспес басылымдарға айналды. Бұл жолы біз оқырманға автордың «Көк түріктерінің империясы» атты жаңа еңбегін ұсынғалы атырмыз. Көкірек көзіңді ашып, ой-санаңды оятар анық дәйекті зерделі толғамдар- рухани құндылық дегеніміз осылар емес пе!