Магауин М.: Шыңғыс хан. Т. 3

Әйгілі жазушы, білімдар тарихшы Мұхтар Мағауиннің "Шыңғыс хан" тетралогиясының орталық ұстыны есепті Үшінші кітабын алаш жұртының алдына тартамыз. Әуелгі екі кітап сияқты, бас-аяғы бүтін, дербес роман десе де болады.

"Тынымсыз майдан" – бүкіл Орталық және Батыс Азияның, қала берді, бүкіл Еуразия халықтарының тарихындағы елеулі оқиға – Шыңғыс ханның Ұлы Хорезм мемлекетімен арадағы қым-қуыт соғысына арналған. Қаламгер, өз сөзімен айтқанда, Шыңғыс ханның бүкіл тарихын,оның ішінде осы, айрықша қантөгісті Сартауыл соғысын да дұшпан көзі, жат жұрттар ұғымымен емес, кешегі дарқан, әрі жауынгер бабалардың бүгінгі ұрпағының таным-білігі тұрғысынан байыптап, деректі, нақты тарихи шындық ауқымында тартымды, көркем тілмен баяндайды. Осы ретте бүгінгі қазаққа тиесілі Отырар және Сыр бойындағы қалалар, Дәшті Қыпшақ жұрты туралы деректі хикаялар мүлде тосын сыпат танытады. Сондай-ақ, бүкіл Хорезм тарихы, Қос-өзен аңғары ғана емес, Иран, Ауған тарабындағы халықтардың тағдыр-талайы да шынайы бейнеленген. Қапқаз, Батыс Қыпшақ және Орыс ахуалы туралы тараулар да айрықша құнды.

Шыңғыс хан эпопеясының Үшінші кітабы туған халқымыздың тарихи танымын кеңейтіп, ұлттық рухын көтеретін үлкен қазына демекпіз.